काठमाडौं– स्वास्थ्य तथा जनसङ्ख्या मन्त्रालयको चालु आर्थिक वर्षको पुँजीगत खर्च कमजोर देखिएको छ । 

महालेखा परीक्षकको कार्यालय को वार्षिक प्रतिवेदनअनुसार मन्त्रालयले कुल संशोधित बजेटको ८२ दशमलव ४९ प्रतिशत खर्च गरे पनि पुँजीगततर्फ भने अपेक्षाकृत न्यून खर्च भएको पाइएको हो ।

प्रतिवेदनअनुसार मन्त्रालय र मातहत निकायका लागि चालु आर्थिक वर्षमा ५१ अर्ब २६ करोड ३ लाख रुपैयाँ संशोधित बजेट कायम गरिएको थियो । त्यसमध्ये ४२ अर्ब २८ करोड ५७ लाख रुपैयाँ अर्थात् ८२ दशमलव ४९ प्रतिशत खर्च भएको उल्लेख छ ।

चालुतर्फ ३७ अर्ब ५४ करोड ६४ लाख रुपैयाँ कायम बजेटमध्ये ३२ अर्ब ९७ करोड ९९ लाख रुपैयाँ खर्च भएको छ, जुन ८७ दशमलव ८४ प्रतिशत हो ।

तर पुँजीगततर्फ १३ अर्ब ७१ करोड ३९ लाख रुपैयाँ बजेटमध्ये ९ अर्ब ३० करोड ५८ लाख रुपैयाँ मात्रै खर्च भएको देखिएको छ। यो कुल पुँजीगत बजेटको ६७ दशमलव ८६ प्रतिशत मात्र हो ।

महालेखा परीक्षकको प्रतिवेदनले पुँजीगत खर्च न्यून रहनुलाई विनियोजन दक्षतासँग जोड्दै बजेट कार्यान्वयन प्रणालीमा सुधार आवश्यक रहेको औँल्याएको छ ।