काठमाडौं- नेपाली कांग्रेसका सांसद अर्जुन नरसिंह केसीले जेनजी आन्दालनबारे मानवअधिकार आयोगको प्रतिवेदन सार्वजनिक नगरिएकोमा आपत्ति जनाएका छन् ।

सोमबार प्रतिनिधिसभाको शून्य समयमा बोल्दै सांसद केसीले लिली थापाको संयोजकत्वमा बनेको मानव अधिकार आयोगको प्रतिवेदन किन र कसको स्वार्थमा रोकिएको छ? भन्दै प्रश्न गरे । उक्त प्रतिवेदन रोकिएको बारे संसद जानकारी पाउनुपर्ने उनको भनाइ छ ।

त्यस्तै उनले गौरीबहादुर कार्की नेतृत्वको आयोगको प्रतिवेदन औपचारिक रुपमा सार्वजनिक गर्दै सांसदहरूलाई उपलब्ध गराउन माग गरे ।

भदौ २४ गते करिब १२ घण्टा नेपाली जनता अनाथ, राज्यविहीन र टुहुरा बनेको भन्दै सांसद केसीले यस्तो घटना नदोहरिने गरि सरकारले प्रत्याभूति गर्नुपर्ने बताए ।

उनले दुवै प्रतिवेदन लुकाउने, जनता झुक्याउने र छलछाम गर्ने काम बन्द गर्नसमेत माग गर्दै तुरून्त प्रतिवेदन सार्वजनिक गरि दोषीमाथि कानुनबमोजिम हदसम्मको कडा कारबाही गर्नुपर्ने धारणा राखे ।