काठमाडौं – बंगलादेशमा रहेको नेपाली राष्ट्रिय भलिबल टोलीले अफगानस्तानसँग प्रतिस्पर्धा गर्दैछ । एसियन भलिबल कन्फेडेरेसन (एभिसी) सेन्ट्रल जोन महिला भलिबल च्याम्पियनसिपको आफ्नो पहिलो खेलमा नेपालले आज अफगानिस्तानको सामना गर्दैछ ।

नेपाल र अफगानस्तानबीचको खेल ढाकास्थित शहीद सुहरावर्दी ईन्डोर स्टेडियममा नेपाली समय अनुसार पौने १ बजे खेल्नेछ । १३ औं दक्षिण एसियाली खेलकुद प्रतियोगिता सागको तयारीमा रहेको महिला टिम लामो समयदेखि नियमित प्रशिक्षणमा छ ।

केही समय अगाडिमात्रै थाईल्याण्डमा प्रशिक्षण गरेर फर्किएको महिला टिमले त्यहाँ रहँदा बलियो टिमसंग मैत्रीपूर्ण भलिबल खेलेको थियो ।

प्रतियोगितामा सहभागी हुन बंगलादेश पुगेको महिला टोलीले पहिलो संस्करणको एभिसी सेन्ट्रल जोनमा स्वर्ण जित्ने लक्ष्य राखेको छ ।

कप्तान अरुणा शाहीले प्रतियोगिताको बलियो टोलीहरु रहेपनि राम्रो खेल्दै स्वर्ण जित्ने बताएकी छन् । प्रतियोगितामा नेपाल सहित कीर्गिस्तान, बंगलादेश, माल्दिभ्स र अफगानिस्तान समावेश छन् ।

राउण्ड रोबिन लिगका आधारमा शीर्ष दुई टिमले उपाधिका लागि प्रतिस्पर्धा गर्नेछन् ।

नेपाली टिम :
अरुणा शाही, प्रतिभा माली, सरस्वती चौधरी, निरुता ठगुन्ना, रेश्मा भण्डारी, पुनम चन्द, जानकी भण्डारी, सुनिता खड्का, सोफिया पुन, उषा कुमारी बिष्ट, कमला पुन, सलिना श्रेष्ठ