काठमाडौं– कृषि, वन तथा वातावरण मन्त्री गीता चौधरीले विदेशबाट अर्बौं रुपैयाँको रासायनिक मल आयात गर्नुपर्ने अवस्थाको अन्त्य गर्नुपर्ने बताएकी छन् ।

शुक्रबार सिंहदरबारमा बसेको प्रतिनिधिसभाअन्तर्गतको कृषि, सहकारी तथा प्राकृतिक स्रोत समिति बैठकमा मन्त्री चौधरीले स्वदेशमै मल कारखाना स्थापना वा अन्य विकल्प विकास गरेर आयातमा निर्भरता घटाउन आवश्यक रहेको बताइन् ।

नले नेपालमै पर्याप्त मल उत्पादन गर्न सकिए हाल मल खरिदका लागि खर्च हुँदै आएको अर्बौं रकम कृषि क्षेत्रको विकासमा उपयोग गर्न सकिने धारणा राखिन्। रासायनिक मल आयातमै मन्त्रालयको झण्डै ५० प्रतिशत बजेट खर्च हुने गरेको उल्लेख गर्दै उनले दीर्घकालीन समाधानतर्फ जानुपर्ने आवश्यकता औंल्याइन्।

मन्त्री चौधरीले कृषि पेशालाई मर्यादित, आकर्षक र व्यावसायिक बनाउन मन्त्रालयले नीतिगत सुधारको काम अघि बढाएको जानकारी दिइन् । कृषि क्षेत्रलाई प्रविधिमैत्री बनाउने, किसानको उत्पादनलाई सहज रूपमा बजारसँग जोड्ने तथा बजारीकरणलाई प्रभावकारी बनाउने विषयमा मन्त्रालय गम्भीर रहेको उनको भनाइ थियो ।

राज्यले कृषकलाई उचित सहजीकरण गर्न सके उत्पादन वृद्धि हुनुका साथै बजार पहुँच पनि सहज बन्ने मन्त्री चौधरीले बताइन्।

बैठकमा समिति सदस्यहरूले कृषि उत्पादनको बजारीकरणका क्रममा किसानहरू मारमा पर्ने गरेको भन्दै बिचौलियाको हस्तक्षेप नियन्त्रण गर्न सरकारको ध्यानाकर्षण गराएका थिए । उनीहरूले रासायनिक मलभन्दा प्राङ्गारिक मलको प्रयोगलाई प्रोत्साहन गर्ने नीति ल्याउन पनि माग गरेका छन् ।