काठमाडौं- पाकिस्तानको बलुचिस्तानमा मानव अधिकारको क्षेत्रमा सक्रिय संस्था बलुच यक्जेहती कमिटी (बिवाईसी) ले केच र पन्जगुर जिल्लामा तीन जनाको गैरन्यायिक हत्या भएको भन्दै कडा निन्दा गरेको छ । बिवाईसीका अनुसार बलुचिस्तानमा मानिसहरूलाई बेपत्ता पार्ने र हत्या गर्ने क्रम रोकिएको छैन ।

गएको मे २ तारिखको बिहान फ्रन्टियर कोर (एफसी) का सुरक्षाकर्मीले केच जिल्लाको जामुरानमा छापा मारेका थिए । उनीहरूले छापा मारी स्थानीय अगुवा ५५ वर्षीय खुदा पीर मुहम्मद बलुच र उनका २५ वर्षीय छोरा अब्दुल्ला बलुचलाई नियन्त्रणमा लिएको बिवाईसीले जनाएको छ ।

सुरक्षा नियन्त्रणमा लिएको पाँच घण्टापछि बाबु-छोराकै शव एफसी क्याम्प नजिकै फेला पर्‍यो । बिवाईसीले यसलाई नियोजित गैरन्यायिक हत्या भनेको छ ।

यस्तै अर्को घटनामा २६ वर्षीय अयाज बलुचको गोली हानी हत्या गरिएको थियो । उनी सरकारी विद्यालयका सफाइ कर्मचारी थिए । बिवाईसीले उनलाई ‘डेथ स्क्वाड’ ले मारेको आरोप लगाएको छ ।

बिवाईसीले बलुच महिलाहरूलाई समेत गैरकानूनी रूपमा थुनामा राख्ने गरिएको दाबी गरेको छ । संस्थाले बलुचिस्तानमा भइरहेको मानव अधिकार उल्लंघनविरुद्ध आवाज उठाउन अन्तर्राष्ट्रिय मानव अधिकारवादी संस्थाहरूसँग अपिल गरेको छ ।