काठमाडौं- अमेरिकाले पाकिस्तानको पेशावरमा रहेको आफ्नो वाणिज्य दूतावास बन्द गर्ने भएको छ । अमेरिकी विदेश मन्त्रालयले एउटा विज्ञप्ति जारी गर्दै यसको जानकारी दिएको हो । मन्त्रालयले आफ्ना प्रतिनिधिको सुरक्षालाई मुख्य कारण देखाएको छ।

अब खैबर पख्तुनख्वा प्रान्तसँग सम्बन्धित सबै कूटनीतिक कार्य इस्लामावादमा रहेको अमेरिकी दूतावासले हेर्नेछ । पेशावर यसै प्रान्तको राजधानी हो । अमेरिकी विदेश मन्त्रालयले आफ्ना कर्मचारीको सुरक्षा र स्रोतको सही उपयोगका लागि यो निर्णय लिएको बताएको छ ।

खैबर पख्तुनख्वा प्रान्त अफगानिस्तानको सिमानासँग जोडिएको छ । यस क्षेत्रमा पाकिस्तानी सेना र लडाकुहरूबीच लामो समयदेखि भीषण लडाइँ भइरहेको छ ।

यसअघि मार्च महिनामा इरानी सर्वोच्च नेता आयतल्लाह अली खामेनीको ज्यान गएपछि पाकिस्तानको ठूलो सहर कराँचीमा रहेको अमेरिकी दूतावासमा आक्रमण भएको थियो ।