काठमाडौं- अन्तर्राष्ट्रिय मानव अधिकारवादी संस्था एमनेस्टी इन्टरनेशनलले पाकिस्तान सरकारसँग बेपत्ता पारिएका अधिकारकर्मीहरूको अवस्था तुरुन्त सार्वजनिक गर्न माग गरेको छ। पश्तुन तहफुज मुभमेन्ट (पीटीएम) का सदस्यहरू हानिफ पश्तिन र नूरुल्लाह तारिन सन् २०२५ नोभेम्बर १२ देखि बेपत्ता छन् । उनीहरूलाई पाकिस्तानको पेसावरबाट नियन्त्रणमा लिइएको थियो।

त्यस दिन उनीहरू प्रान्तीय सभाको एउटा बैठकमा सहभागी हुन गएका थिए । बैठकमा आफ्ना कुरा राख्न नपाएपछि उनीहरूले कार्यक्रम बहिस्कार गरेका थिए । सभा भवनबाट बाहिरिने क्रममा प्रहरीले उनीहरूलाई नियन्त्रणमा लिएको जनाइएको छ । प्रत्यक्षदर्शीका अनुसार प्रहरीले उनीहरू सहित टोलीका सात सदस्यलाई गाडीमा हालेर लगेको थियो ।

पक्राउ परेका सात जनामध्ये पाँच जनालाई सन् २०२६ जनवरी १८ मा पञ्जाबको एउटा जेलबाट मुक्त गरिएको थियो । तर हानिफ पश्तिन र नूरुल्लाह तारिन अझै पनि बेपत्ता छन् । उनीहरू कहाँ छन् र कुन अवस्थामा छन् भन्ने कुरा सरकारले गोप्य राखेको छ । उनीहरूका परिवारले यसबारे कुनै आधिकारिक जानकारी पाएका छैनन् ।

२८ वर्षीय हानिफ पश्तिन पीटीएमका केन्द्रीय सदस्य हुन् । ५० वर्षीय नूरुल्लाह तारिन सिन्ध प्रान्तका संयोजक हुन् । पीटीएमले पश्तुन समुदायमा हुने गैरन्यायिक हत्या र बेपत्ता पार्ने कार्यविरुद्ध शान्तिपूर्ण रूपमा आवाज उठाउँदै आएको छ । पाकिस्तान सरकारले सन् २०२४ अक्टोबरमा यो संस्थामाथि प्रतिबन्ध लगाएको थियो ।