बेइजिङ– अमेरिकी राष्ट्रपति डोनाल्ड ट्रम्पको चीन भ्रमण शुक्रबार तेस्रो दिनमा प्रवेश गरेको छ।

ट्रम्पले बिहीबार बेइजिङमा चिनियाँ राष्ट्रपति सी चिनफिङसँग मिलेर ‘टेम्पल अफ हेभेन’ अवलोकन गरेका छन्।

टेम्पल अफ हेभन भ्रमणका क्रममा ट्रम्पसँग उनका छोरा एरिक ट्रम्प र बुहारी लारा ट्रम्प पनि उपस्थित थिए। त्यसपछि दुवै नेताबीच द्विपक्षीय बैठक भएको थियो।

चीनले बुधबार साँझ ट्रम्पको सम्मानमा राजकीय भोज आयोजना गरेको थियो। भोजमा चीनको चर्चित परिकार ‘बेइजिङ रोस्ट डक’ अर्थात् भुटेको हाँस परोसिएको थियो। यसका साथै बीफ रिब्स पनि राखिएको थियो।

रिपोर्टका अनुसार ट्रम्पलाई राम्ररी पकाइएको मासु मन पर्ने भएकाले मेन्युमा उक्त परिकार समावेश गरिएको थियो। मिठाईमा तिरामिसु, आइसक्रिम, ताजा फलफूल र शंखजस्तै देखिने विशेष पेस्ट्री परोसिएको थियो।

यता अमेरिकी सञ्चारमाध्यम फक्स न्युजका पत्रकारहरू बेइजिङका सडकमा जडान गरिएका सयौं सीसीटीभी क्यामेरा देखेर आश्चर्यचकित भएका बताइएको छ।