काठमाडौं- काठमाडौंको कीर्तिपुरमा गत वैशाख २३ गते चक्कु प्रहारी गुल्मीका विपिन घिमिरेको हत्यामा संलग्नमध्ये एकजनालाई प्रहरीले गोली हानेर समातेको छ । 

उपत्यका अपराध अनुसन्धान कार्यालयको टोलीले बिहीबार साँझ तीय युवकलाई गोली हानेर समातेको हो । सुजन शाही नामका ती युवक विपिन हत्याका योजनाकार रहेको बताइएको छ।

कीर्तिपुरमा बस्दै आएका युवक घिमिरेको हत्यामा संलग्न भनिएका शाही भागेर हिँडेका थिए। बीए पढ्दै गरेका विपिनमाथि चक्कु हान्ने दुईजनामध्ये एकजना दुई दिनअघि मात्रै झै-झगडा कसुरमा पक्राउ परेर छुटेको खुलेको थियो ।

विपिनको हत्यामा संलग्नमध्ये कैलालीका राज विष्ट दुई दिनअघि मात्रै प्रहरीको हिरासतबाट छुटेको खुलेको थियो ।

प्रहरीले पनि प्रारम्भिक अनुसन्धानबाट उनै राज विष्टले विपिनमाथि चक्कु हानेको पत्ता लगाएको थियो। काठमाडौंको कीर्तिपुर नगरपालिका वडा नम्बर-१०, बोडेटोलमा बसेर पढ्दै आएका घिमिरेको चक्कु हानेर ज्यान लिइएको थियो।

उक्त घटनाबारे अनुसन्धानका लागि प्रहरीले कीर्तिपुरबाट अन्य तीनजना युवकलाई पक्राउ गरेर हिरासतमा राखेको थियो।