काठमाडौं- अमेरिकी राष्ट्रपति डोनाल्ड ट्रम्पसँगै विदेशमन्त्री मार्को रुबियो पनि यतिबेला चीन भ्रमणमा छन् । अमेरिकी प्रतिनिधिमण्डलको जम्बो टोलीका साथ राष्ट्रपति ट्रम्प र विदेशमन्त्री रुबियो चीन पुगेका हुन् ।

रुबियो चीनले प्रतिबन्ध लगाएका नेता हुन् । विदेशमन्त्री बन्नु अघिदेखि नै चीनले रुबियोमाथि प्रतिबन्ध लगाएको छ । अहिले आफैँले प्रतिबन्ध लगाएका नेतालाई चीनले कसरी प्रवेश दियो भन्ने चर्चा छ ।

समाचारमा जनाइएअनुसार चीनले जुक्ति लगाएर रुबियोलाई बेइजिङमा स्वागत गरेको हो । अल जजीराका अनुसार चीनले रुबियोलाई बेइजिङमा स्वागत गर्न रुबियोको नाम नै परिवर्तन गरेको छ ।

चीनले अमेरिकी विदेशमन्त्री रुबियोको नाम नै बदलेको छ । आधिकारिक कागजातमा उनको नामको पहिलो अक्षर ‘रु’ लाई बदलेर ‘लु’ राखिएको छ । चिनियाँ रेकर्डमा उनको नाम ‘मार्को लु’ कायम गरिएको छ ।

रुबियोमाथिको प्रतिबन्ध नहटाउनका लागि चीनले यस्तो कूटनीतिक जुक्ति लगाएको अल जजीराले उल्लेख गरेको छ ।

चिनियाँ विदेश मन्त्रालयले सन् २०२५ को जनवरीमै यसको तयारी गरेको थियो । रुबियो विदेशमन्त्री बनेदेखि नै चीनका सरकारी सञ्चारमाध्यमले उनको नामको उच्चारण परिवर्तन गरिसकेका थिए ।

मन्त्रालयले ट्रम्पसँगै रुबियोलाई पनि चीनमा स्वागत गर्ने संकेत मार्चमै दिएको थियो ।

रुबियो सिनेटर हुँदा चीनले उनीमाथि दुई पटक प्रतिबन्ध लगाएको थियो । क्युबाली मूलका रुबियो कम्युनिष्ट विचारधाराका कट्टर आलोचक हुन् । हङकङ र सिनजियाङ मामिलामा कडा टिप्पणी गरेकै कारण उनी चीनको तारो बनेका थिए ।