काठमाडौं- नेपाली कांग्रेसका नेता मोहनबहादुर बस्नेतले सभापति गगनकुमार थापाले कांग्रेसलाई ‘हाइज्याक’ गरेर कब्जा गरेको आरोप लगाएका छन्।

काठमाडौंमा बुधबार आयोजित बागमती प्रदेशस्तरीय भेलामा बस्नेतले आफू थापासँग लत्रेर नजाने पनि बताए । उनले सभापति थापासँग झुकेर कुनै किसिमको सहमति र सम्झौता नगर्ने पनि जिकिर गरे ।

बस्नेतले उक्त भेलामा आफू पहिलेदेखि नै सभापति थापाको विरोधी रहेको बताउँदै झुकेर नमिसिने जिकिर गरे । उनले पार्टीभित्र कृत्रिम रूपमा नेतृत्व बनाइएको आरोप पनि लगाएका छन्।

बस्नेतले आवश्यक परे युवा र भ्रातृ संगठनका कार्यकर्ताहरूलाई सडकमा उतार्ने पनि चेतावनी दिए।

विशेष महाधिवेशनबाट आएको थापा नेतृत्वको नेपाली कांग्रेसले एकलौटी रुपमा भ्रातृ संगठनहरू चलाउन खोजेको आरोप पनि पूर्वसञ्चारमन्त्रीसमेत रहेका बस्नेतले लगाएका छन्।