बेइजिङ- इरानले मध्यपूर्व र खाडी क्षेत्रमा शान्ति तथा स्थायित्व कायम गर्न चिनियाँ राष्ट्रपति सी चिनफिङले अघि सारेको चार बुँदे प्रस्तावलाई समर्थन गरेको छ ।

चीनका लागि इरानी राजदूत अब्दोलरेजा रहमानी फजलीले सामाजिक सञ्जालमार्फत् इरान उक्त प्रस्तावको समर्थन गर्न तयार रहेको बताएका हुन् ।

हालै इरानी विदेशमन्त्री अब्बास अराघाची र चिनियाँ विदेशमन्त्री वाङ यीबीच बेइजिङमा भएको भेटवार्तामा पनि यो विषय उठाइएको थियो ।

यो अभिव्यक्ति अमेरिकी राष्ट्रपति डोनाल्ड ट्रम्पको १३ देखि १५ मेसम्म चीन भ्रमण हुन लागिरहेका बेला आएको हो । भ्रमणका क्रममा ट्रम्प र चिनियाँ राष्ट्रपति सी चिनफिङबीच महत्वपूर्ण भेटवार्ता हुने बताइएको छ ।

चीनले अघि सारेको चार बुँदे प्रस्तावमा पश्चिम एसिया र फारसको खाडी क्षेत्रमा साझा सुरक्षा संरचना निर्माण गर्ने, सबै राष्ट्रको सार्वभौमिकता र सीमाको सम्मान गर्ने, अन्तर्राष्ट्रिय कानुनको पालना गर्ने तथा सैन्य बलको प्रयोगबाट निर्णय थोपर्न नहुने विषय समेटिएका छन् ।

त्यस्तै विकास र सुरक्षालाई सन्तुलित रूपमा अघि बढाउँदै दीर्घकालीन आर्थिक स्थायित्व कायम गर्नुपर्नेमा पनि प्रस्तावले जोड दिएको छ ।

गत अप्रिल १४ मा बेइजिङमा संयुक्त अरब इमिरेट्सका युवराज शेख खालिद बिन मोहम्मद बिन जायद अल नाहयानसँगको भेटमा राष्ट्रपति सीले उक्त प्रस्ताव सार्वजनिक गरेका थिए ।

यसैबीच चिनियाँ विदेशमन्त्री वाङ यीले पाकिस्तानका उपप्रधान तथा विदेशमन्त्री मोहम्मद इशाक दार र इरानी विदेशमन्त्री अराघ्चीसँग पनि छुट्टाछुट्टै संवाद गरे ।

संवादका क्रममा चीनले इरान–अमेरिका तनाव कम गर्न तथा युद्धविराम कायम राख्न कूटनीतिक पहल जारी राख्ने जनाएको छ ।

चीनले मध्यपूर्व क्षेत्रमा दीर्घकालीन शान्ति, स्थायित्व र क्षेत्रीय सहकार्यका लागि आफू रचनात्मक भूमिका खेल्न तयार रहेको दोहोर्‍याएको छ ।