काठमाडौं– प्रतिनिधि सभा र राष्ट्रिय सभाको सोमबार बसेको संयुक्त बैठकमा राष्ट्रपति रामचन्द्र पौडेलले आगामी आर्थिक वर्षका लागि नीति तथा कार्यक्रम वाचन गरिरहँदा प्रधानमन्त्री वालेन्द्र शाह उठेर हिँडिदिए ।

संसद्को रोस्ट्रममा पुगेर नीति तथा कार्यक्रम पुस्तिका हस्तान्तरण गरेर आफ्नो आशनमा फर्किएका प्रधानमन्त्री शाह केही बेरमै निस्किएर हिँडे ।

प्रधानमन्त्री संसद्‍बाट जुरूक्क उठेर हिँडेपछि सांसदहरू पनि चकित परेका छन् । राष्ट्रपतिले सम्बोधन गरेका बेला सामान्य मर्यादामसेत हेक्का नराखी प्रधानमन्त्री हिँडेपछि सांसदहरूले विरोध सुरू गरेका छन् ।

नेपाली कम्युनिस्ट पार्टीका प्रमुख सचेतक युवराज दुलालले प्रधानमन्त्री बालेनले अमर्यादित, अभद्र र गैरजिम्मेवार प्रवृत्ति देखाएको भन्दै कडा आपत्ति जनाएका छन् ।

राष्ट्रपति पौडेलले आगामी आर्थिक वर्षको नीति तथा कार्यक्रम पढिरहेका बेला प्रधानमन्त्री बीचमै जुरूक्क उठेर हिँडेपछि दुलालले आपत्ति जनाएका हुन् ।

उनले आफ्नै सरकारले बनाएर राष्ट्रपतिकहाँ हस्तान्तरण गरेको नीति तथा कार्यक्रम पूरा सुन्दै नसुनी प्रधानमन्त्री हिँड्नु अमर्यादित र आपत्तिजनक रहेको बताए ।

’आफैँले तयार गरेर राष्ट्रपतिलाई हस्तान्तरण गरेको सरकारको नीति तथा कार्यक्रम बाचन गरिरहँदा प्रधानमन्त्री बालेन्द्र शाहले संसद् छाडेर हिँड्नु अमर्यादित, अभद्र र गैरजिम्मेवार प्रवृत्ति हो’, उनले भने, ‘आफ्नै सरकारको कार्यक्रम पनि पूरा नसुनी संसद्बाट हिँड्नु आपत्तिजनक हो ।’