काठमाडौं– पूर्व सञ्चारमन्त्री तथा रास्वपा सांसद जगदीश खरेलले स्मार्ट टेलिकम प्रकरणमा आफ्नो संलग्नता पुष्टि भए राजनीतिक जीवनबाट बिदा लिने घोषणा गरेका छन् ।

सोमबार बसेको प्रतिनिधिसभा बैठकमा बोल्दै उनले स्मार्ट टेलिकमको अनियमिततासँग जोडेर आफूलाई अनावश्यक रूपमा मुछिएको भन्दै आपत्ति जनाए।

‘स्मार्ट टेलिकम प्रकरणमा मेरो कुनै संलग्नता छैन। यदि संलग्नता पुष्टि भयो भने म राजनीतिक जीवनबाटै बिदा लिन्छु,’ खरेलले भने।

खरेलले सभामुख डोलप्रसाद अर्याल र पार्टी सभापति रवि लामिछानेलाई जानकारी दिएर स्विट्जरल्याण्ड गएको अवस्थामा पनि आफूलाई सो प्रकरणमा जोडेर आएका समाचारप्रति खेद व्यक्त गरे।

उनले स्मार्ट टेलिकम प्रकरणसँग सम्बन्धित कुनै पनि बैठकमा सहभागी नभएको र कुनै फाइल अघि नबढाएको स्पष्ट पारे।

आफूमाथिका आरोप प्रमाणित गर्न नसके सम्बन्धित सञ्चारमाध्यम नै बन्द हुनुपर्ने भन्दै उनले चुनौतीसमेत दिए।