काठमाडौं- प्रमुख प्रतिपक्षी दल नेपाली कांग्रेसले संघीय संसद् अन्तर्गत राज्य व्यवस्था तथा सुशासन समितिको सोमबार बसेको बैठक बहिष्कार गरेको छ ।

समितिको यसअघिसहित बसेका दुईवटा बैठकमा प्रधानमन्त्री वालेन्द्र शाह लगातार दुई पटक अनुपस्थित भएको भन्दै प्रमुख प्रतिपक्षी कांग्रेसले सोमबार बिहान ११ बजे बस्ने गरी बोलाइएको बैठक बहिष्कार गरेको हो ।

गत वैशाख ९ गते सुधन गुरुङले राजीनामा दिएपछि गृहमन्त्री पनि जिम्मेवारी सम्हालिरहेका प्रधानमन्त्री शाहसँग सांसदहरूले प्रश्न सोध्ने तालिका थिए ।

सांसदहरूले गृह एवम् प्रधानमन्त्री बालेनसँग सुरक्षा-प्रशासन र गृह मन्त्रालयसँग सम्बन्धित विभिन्न विषयमा जवाफ माग्ने तयारी कांग्रेसको थियो ।

कांग्रेसले समिति सभापतिलाई पनि यसबारे जानकारी गराएको थियो । तर, प्रधानमन्त्री बालेन बैठकमा नआएपछि कांग्रेसले बैठक बहिष्कार गरेर हिँडेको हो ।

संसदीय समितिको बैठकमा कांग्रेसबाट संसदीय दलका नेता भीष्मराज आङ्देम्बे र सचेतक निश्कल राईले प्रतिनिधित्व गर्छन् । त्यसैगरी सांसदहरू अर्जुननरसिंह केसी र रेखाकुमारी यादव पनि बैठकमा सहभागी भएनन् ।