चेन्नई- तमिलगा भेत्री कझगम (टीभीके) पार्टीका प्रमुख सी. जोसेफ विजयले तमिलनाडुको १३औँ मुख्यमन्त्रीका रूपमा शपथ लिएका छन् ।

उनले शपथ लिएसँगै धर्मनिरपेक्षता र सामाजिक न्यायमा आधारित शासनको प्रतिबद्धता व्यक्त गरेका छन्। उनले आफ्नो पहिलो सम्बोधनमै सबै वर्गलाई समेटेर अघि बढ्ने बताएका छन्।

शपथ ग्रहणपछि चेन्नईस्थित जवाहरलाल नेहरू इन्डोर स्टेडियममा आयोजित कार्यक्रममा विजयले तमिलनाडुमा ‘वास्तविक युग’ सुरु भएको घोषणा गरे।

उनले भने, ‘आउनुहोस्, हामी सबै मिलेर तमिलनाडुलाई नयाँ सरकार दिऔँ। यो नयाँ सुरुवात हो, यस्तो युगको सुरुवात जसको आधार धर्मनिरपेक्षता र सामाजिक न्याय हुनेछ।’

विजयको यो अभिव्यक्तिलाई विशेषगरी अल्पसंख्यक तथा समावेशी शासनको अपेक्षा गरेका समुदायका लागि महत्वपूर्ण सन्देशका रूपमा हेरिएको छ।

उनले आफू कुनै शाही परिवारबाट नआएको उल्लेख गर्दै आफूलाई जनताको छोरा, दाजुभाइ र परिवारकै सदस्यका रूपमा प्रस्तुत गरे।

‘म सामान्य मानिस हुँ। सम्भव नभएको वाचा गर्दिनँ,’ उनले भने, ‘निर्वाचनका क्रममा गरेका सबै प्रतिबद्धता पूरा गर्न म प्रतिबद्ध छु र तमिलनाडुका जनताप्रति आफूलाई ऋणी ठान्छु।’

मुख्यमन्त्री विजयले आफ्नो सरकारले सामाजिक समानता, धर्मनिरपेक्ष राजनीति र सबै वर्गको सहभागितालाई प्राथमिकता दिने संकेत गरे। उनले सामाजिक न्याय र बराबरीलाई केन्द्रमा राखेर नयाँ तमिलनाडु निर्माण गर्ने प्रतिबद्धता व्यक्त गरे।

सिनेमा क्षेत्रबाट राजनीतिमा आएको आफ्नो यात्राबारे बोल्दै विजयले जनताले दिएको विश्वास नै आफ्नो सबैभन्दा ठूलो शक्ति भएको बताए। उनले राजनीतिमा आउनुको उद्देश्य जनताको ऋण तिर्नु रहेको पनि उल्लेख गरे।

युवालाई लक्षित गर्दै उनले भविष्य निर्माणका लागि आफू सधैं युवासँग रहने र उनीहरूको हितमा काम गर्ने बताए। विजयको यो सन्देशलाई युवा र विभिन्न समुदायबीच आफ्नो समर्थन आधार बलियो बनाउने प्रयासका रूपमा समेत हेरिएको छ।