मकवानपुर– आठौँ बागमती गोल्डकप फुटबल प्रतियोगिताको फाइनल खेल आज हुँदैछ ।

मकवानपुरको बागमती गाउँ पालिकाको शहीद स्मृति रंगशालामा दिउँसो ३ बजे हुने फाइनलमा चित्लाङ एफसी र बागमती युवा क्लब सर्लाहीबीच प्रतिस्पर्धा हुनेछ।

चित्लाङ एफसीले पहिलो खेलमा एपीएफलाई, क्वाटरफाइनलमा मछिन्द्र एफसीलाई र सेमिफाइनलमा नवजनजागृति युवा क्लब सिमरालाई हराउँदै फाइनल यात्रा तय गरेको थियो।

यस्तै, बागमतीले भने पहिलो खेलमा आयोजक बागमती खेलकुद विकास समितिलाई, क्वाटरफाइनलमा चर्च ब्वाइज युनाइटेड र सेमिफाइनलमा फ्रेन्ड्स क्लबलाई ट्राइब्रेकरमा हराउँदै उपाधि नजिक पुगेको हो ।

प्रतियोगिताको विजेताले १० लाख रुपैयाँ र दोस्रो टोलीले ५ लाख रुपैयाँ पुरस्कार प्राप्त गर्नेछन् ।

प्रतियोगिताको सर्वोत्कृष्ट खेलाडीले १ लाख १ हजार रुपैयाँ तथा विधागत उत्कृष्ट खेलाडीहरूले जनही २५ हजार रुपैयाँ प्राप्त गर्ने आयोजकले जनाएको छ ।