टक्सार– जिल्ला सदरमुकाममा आयोजित मेयर कप महिला फुटबल प्रतियोगिताअन्तर्गत आज भएको सेमिफाइनल खेलमा फेयर फुटबल क्लब धरानलाई ‘पेनाल्टी’मा ४–२ गोलअन्तरले हराउँदै सङ्खुवासभा–११ फाइनल प्रवेश गरेको छ । 

आठौँ संस्करणको खेलअन्तर्गत आजको पहिलो सेमिफाइनलमा खेलको अन्तिम समयमा दुवै टोलीबाट एक–एक गोल भएपछि खेल पेनाल्टीतर्फ धकेलिएको थियो । खेलको निर्धारित समयमा सङ्खुवासभाका लागि जर्सी नं ९ का अनिता रानामगरबाट एक गोल र धरानका लागि जर्सी नं ५ का युनिशा राईबाट एक गोल भएको थियो । 

पेनाल्टीतर्फ सङ्खुवासभा–११ का लागि जर्सी नं १४ मनिता तामाङ, जर्सी नं ९ अनिता रानामगर, जर्सी नं ७ मनिषा थापामगर र जर्सी नं ८ किरण लिम्बूबाट एक–एक गोल भयो भने धरानका लागि जर्सी नं २ विजेता राई र जर्सी नं ५ युनिशा राईले एक–एक गोल गरे । यस खेलको ‘म्यान अफ दी म्याच’ सङ्खुवासभाका गोलरक्षक झरना नगरकोटीले ट्रफीसहित रु दुई हजार पाइन् ।

दोस्रो सेमिफाइनल खेल लेटाङ फुटबल क्लब र गेरबाबा फुटबल क्लब झापाबीच हुने आयोजक भोजपुर जिल्ला फुटबल सङ्घका अध्यक्ष प्रवीण सुवालले जानकारी दिए । बुधबार हुने फाइनल खेल हुनेछ भने विजेताले नगद रु एक लाख छ हजार र उपविजेताले ५५ हजार पाउनेछन् ।

जिल्ला फुटबल सङ्घको आयोजना तथा भोजपुर नगरपालिकाको मुख्य प्रायोजनमा वैशाख २१ देखि प्रतियोगिता सुरु भएको हो । भोजपुर नगरपालिका–७ कोदार रङ्गशालामा जारी प्रतियोगितामा भोजपुर नगरपालिका–१० भैसीपङ्खा, सङ्खुवासभा–११ सङ्खुवासभा, फेयर फुटबल क्लब धरान, रिमाचुङ फुटबल क्लब टेम्केमैयुङ, लेटाङ फुटबल क्लब र गेरबाबा फुटबल क्लब झापाले सहभागिता जनाएका छन् ।