तेहरान- इरानका विदेशमन्त्री अब्बास अराघचीले चीन भ्रमण गर्ने भएका छन् । उनी आजै चीन जान लागेको अन्तर्राष्ट्रिय सञ्चार माध्यमले जनाएका छन् । द्विपक्षीय वार्ताका लागि केही बेरमा उनी बेइजिङ प्रस्थान गर्ने अल जजीराले उल्लेख गरेको छ ।

इरानी विदेश मन्त्रालयले जारी गरेको संक्षिप्त विज्ञप्ति अनुसार भ्रमणका क्रममा अराघचीले चिनियाँ समकक्षी वाङ यीसँग भेटवार्ता गर्नेछन् । सो अवसरमा दुई देशबीचको आपसी सम्बन्धका साथै क्षेत्रीय र अन्तर्राष्ट्रिय घटनाक्रमका विषयमा विस्तृत छलफल हुने बताइएको छ ।

पछिल्लो समय इजरायल र संयुक्त राज्य अमेरिकाले फेब्रुअरी २८ देखि सुरु गरेको हमलाका कारण पश्चिम एशियामा संकट गहिरिँदै जाँदा अराघची चीन जान लागेका हुन् । युद्ध अन्त्य र स्थायी शान्तिका लागि अमेरिका र इरानबीच भइरहेका वार्ताहरू अहिले पनि गतिरोधमा रहेका बेला इरानी विदेशमन्त्रीको यो भ्रमण हुन लागेको हो ।