काठमाडौँ – समाजिक विषयमा आवाज उठाउनु कलाकारको नैतिक जिम्मेवारी हो ।

बालेन्द्र शाह नेतृत्वको सरकारले सकुमबासी बस्ती जबरजस्ती हटाएको विषयमा धेरै कलाकारले आफ्नो विचार सार्वजनिक गरेका छैनन् ।

आफ्ना दर्शकको बस्ती हट्ने विषयमा उनीहरूको माैनतालाई सामान्य मान्न मिल्दैन । कलाकारको उच्च समर्थन पाएको यही सरकारले नै बस्ती हटाएको हो ।

सरकारकले बस्ती हटाएपछि सामाजिक सञ्जालमा दुई विचार सर्वाजनिक भएका छन् । पहिलो- मानवता नभएको सरकार र दोस्रो- नजितामुखी सरकार ।

बस्ती हटाएपछि त्यहाँका कारुणिक दृश्यले पहिलो विचार राख्नेको चित्त दुखाएको छ । यसलाई उनीहरूले सामान्य मानेका छैनन् । गरिबमाथि सरकारले देखाएको अमानवीय व्यवहार उनीहरूका लागि स्वीकार्य छैन । उनीहरूको बुझाइमा यो ‘अपराध’ हो ।

दोस्रो पक्षले कानुनको पलाना गर्दा यस्ता विषय सामान्य रुपमा सिर्जना हुने धारणा राख्छन् ।

यही परिदृश्यमा नायक दयाहाङ राईले सामाजिक सञ्जालमा लेखे, ‘यहाँ सम्पत्ति त लुकाउन सकिने रहेछ, गरिबी पो लुकाउन सकिदो रहेनछ ।’

सतहीरुपमा हेर्दा दयाहाङको यो अभिव्यक्ति सरकार लक्षित देखिन्छ । सम्पत्ति लुकाउन सकिने रहेछ भन्ने लाइनले राष्ट्रिय स्वतन्त्र पार्टीलाई नै बढी कटाक्ष हुने देखिन्छ । त्यस पार्टीका मन्त्री र सांसदको सम्पत्ति अस्वभाविक बढी देखिएको छ ।

गरिबी लुकाउन नसकिने रहेछ भन्ने लाइनले सुकुमबासी बस्ती हटाउँदा विकसित दृश्यलाई लक्षित गर्छ । बासस्थान भत्काइएपछि त्यहाँ परिवारको बिचल्ली र कारुणिक दृश्यले सामाजिक सञ्जाल तातेको छ ।

कलाकारका रुपमा दयाहाङले सरकारलाई सचेत गराउन कटाक्ष गरे । तर, सरकारको नेतृत्व गरिरहेको दलका समर्थकबाट उनले गाली भेटेका छन् ।

उनले स्ट्याट्स लेख्ने बित्तिकै एक व्यक्तिले कमेन्ट छोडेका थिए, ‘अब क्षेत्रमा स्वागत छ ।’ अर्थात्, गाली खानेमा ठाउँमा स्वागत छ । नभन्दै त्यस्तै भयो । भद्र शैलीमा विचार राख्दा कमेन्ट बक्समा अपमानका शब्दले भरियो ।

दयाहाङलाई ‘श्रम संस्कृतिक पार्टी’को समर्थक रहेको आरोप लगाउँदै गाली गरेका छन् ।

केहीले उनलाई अश्लील शब्द प्रयोग गरेर फिल्म बहिस्कार गर्ने धम्की दिएका छन् ।

जातीय हिसाबले हर्क साम्पाङको समर्थनमा लेखेको सम्मको गम्भीर अरोप उनीमाथि छ । श्रम संस्कृति पार्टीका हर्क सुकमबासीको बिचल्लीविरुद्ध बोल्दै आएका छन् ।

हर्कको विचारसँग मिल्ले स्ट्याट्सले उनलाई जातीवादीको गम्भीर आरोप पनि लागेको छ ।

दयाहाङले सुकुमबासी बस्ती हटाउनु सही वा गलत किटान गरेका छैनन् । मानवताको कुरा गर्दा जातिवादको आरोपसम्म खेप्नु कत्तिको न्यायपूर्ण हो ?

सामाजिक सञ्जालमा जसले जे मन लाग्छ त्यही गर्ने प्रवृति विकास भएको परिपेक्षमा मानवताको पक्षमा बोलेका दयाहाङ पनि गालीको शिकार हुनुपर्‍यो ।

दयाहाङले आइतबार बिहान साढे १० बजे राखेको उक्त स्ट्याटसमा धेरै प्रतिक्रिया आएका छन् । बहुसंख्य कमेन्टमा अश्लीलता र अभद्रता झल्कन्छ ।