तेहरान- इरानको नेशनल इरानियन ट्यांकर कम्पनीको एक भीएलसीसी सुपरट्यांकरले अमेरिकी नाकाबन्दी छल्दै एसिया–प्रशान्त क्षेत्रमा प्रवेश गरेको छ।

अल जजीराका अनुसार ह्यूज नामको उक्त जहाजले करिब १.९ मिलियन ब्यारेल कच्चा तेल बोकेको छ, जसको मूल्य झण्डै २२० मिलियन डलर रहेको बताइएको छ।

यो ट्यांकर पछिल्लो पटक श्रीलंकाको आसपासमा देखिएको थियो । हाल इन्डोनेसियाको लोम्बोक जलडमरूमध्य हुँदै रियाउ द्वीपसमूहतर्फ अघि बढिरहेको छ।

बताइएअनुसार उक्त जहाजले मार्च महिनादेखि आफ्नो अटोमेटिक आइडेन्टिफिकेशन सिस्टम (एआईए) बन्द राखेको थियो, जसका कारण यसको ट्र्याकिङ कठिन बनेको थियो।

इरानले आफ्ना दर्जनौँ जहाजहरूले यो नाकाबन्दी पार गरिसकेको दाबी गरेको छ। तर अमेरिकाले भने धेरै जहाजहरूलाई फर्कन बाध्य बनाएको बताएको छ। यस कदमबाट इरानलाई ठूलो आर्थिक क्षति पुगेको अमेरिकाले जनाएको छ।