काठमाडौं- नेपालले दिएको २ सय ९० रनको लक्ष्य पछ्याएको यूएईको इनिङ संकटमा परेको छ । आईसीसी पुरुष क्रिकेट विश्वकप लिग २ अन्तर्गत शुक्रबार जारी खेलमा यूएईले लगातार विकेट गुमाएपछि यूएईको इनिङ संकटमा परेको हो ।

ताजा अवस्थामा यूएईले ३२ ओभरको खेल सकिँदासम्म ६ विकेट गुमाएर १ सय ७६ रन बनाएको छ । यूएईका मुहम्मद शहदादले सर्वाधिक ६५ रन बनाएका छन् । ७२ बलको सामना गरेका उनले ४ चौका र दुई छक्का प्रहार गरेका छन् । यूएईका हरप्रित सिंहले ४० बलमा ४१ रन बनाएका छन् । त्यस्तै, आयंश शर्माले ३२ बलमा ३३ रन जोडे ।

नेपालका सन्दीप लामिछानेले तीन तथा सोमपाल कामीले दुई विकेट लिएका छन् । नन्दन यादवले एक विकेट लिएका छन् ।

यसअघि त्रिवि अन्तर्राष्ट्रिय क्रिकेट रंगशालामा जारी खेलमा टस जितेर पहिले ब्याटिङ गरेको नेपालले निर्धारित ५० ओभरमा सात विकेट गुमाउँदै २ सय ८९ रन बनायो । नेपालका लागि दीपेन्द्रसिंह ऐरीले शतकीय पारी खेले ।

९४ बलको सामना गरेका उनले १३ चौका र एक छक्का प्रहार गरे । त्यस्तै, विनोद भण्डारीले ७९ बलमा ५६ रन जोडे । गुल्शन झाले ३८ बलमा ४४ रन बनाए ।

यूएईका जुनैद सिद्दिक र अजय कुमारले समान दुई तथा खुजैमा तनवीर र हैदर अलीले समान एक विकेट लिए ।