काठमाडौं- नेपाली कम्युनिष्ट पार्टी(नेकपा)का सह–संयोजक माधव कुमार नेपालले वर्तमान सरकारले नागरिकको अधिकार खोस्न लागेको आरोप लगाएका छन् ।

अन्तर्राष्ट्रिय मजदुर दिवसका अवसरमा अखिल नेपाल ट्रेड युनियन महासंघ र एकीकृत ट्रेड युनियन महासंघले शुक्रबार काठमाडौंमा आयोजना गरेको कार्यक्रममा सह–संयोजक नेपालले गणतन्त्रमा सबै नागरिकको अधिकार सुनिश्चित हुनुपर्ने बताए ।

बालेन शाह नेतृत्वको वर्तमान सरकारले नागरिकको अधिकार खोस्न लागेको आरोप पनि पूर्वप्रधानमन्त्रीसमेत रहेका नेपालले लगाएका छन् ।

विद्यार्थी र मजदुरको अधिकार नै सरकारले खोस्न लागेको भन्दै उनले संगठित हुन पाउने संवैधानिक ग्यारेन्टी कसैले खोस्न नपाउने उल्लेख गरे ।

उनले देशलाई अघि बढाउन कुनै समस्या भए आफूहरू पनि सँगै बसेर समाधान खोज्ने धारणा राखेका छन् ।

त्यस्तै सह–संयोजक नेपालले वास्तविक सुकुम्वासीको पहिचान नै नगरी दमन गर्ने कामलाई जायज भन्न नसकिने स्पष्ट पारे।

वर्तमान सरकारले एकपछि अर्को जनविरोधी काम गरिरहेकाले सरकारको प्रारम्भीक लक्षण राम्रो नदेखिएको उनको भनाइ छ ।

नेपालले जनतालाई पीडा र यातना दिने गरि जनविरोधी काम नगर्नसमेत सरकारलाई सुझाव दिए । नेपालले मजदुरहरूको समस्यालाई दीर्घकालीन रूपमा समाधान गर्न पनि आग्रह गरेका छन् ।