काठमाडौं – सिमभिन इन्टरनेशनल इम्पेक्सका सञ्चालक नविनकुमार अग्रवाल पक्राउ परेका छन् ।

नेपाल प्रहरीको केन्द्रीय अनुसन्धान ब्यूरो (सीआईबी)ले वाणिज्य आपूर्ति तथा उपभोक्ता संरक्षण विभागको लेटरहेड, छाप र पूर्वमहानिर्देशकको नाम तथा हस्ताक्षर दुरुपयोग गरी १०० टन छोकडा (खजुर) आयातको लागि किर्ते अनुमति पत्र तयार गरेको आरोपमा उनलाई पक्राउ गरेको हो ।

निकासी पैठारी (नियन्त्रण) ऐन, २०१३ अनुसार सरकारले छोकडा पैठारीमा पूर्ण बन्देज लगाएको अवस्थामा उक्त अनुमति पत्र बनाइ भन्सार कार्यालयमा पेश गरिएको अनुसन्धानमा खुलेको ब्यूरोले जनाएको छ ।

मुलुकी अपराध संहिता, २०७४ को लिखत सम्बन्धी कसुरअन्तर्गत अनुसन्धानका लागि काठमाडौं जिल्ला अदालतबाट पक्राउ अनुमति लिएर उनलाई पर्साको वीरगञ्ज महानगरपालिका–११, आदर्शनगरबाट पक्राउ गरिएको हो । केन्द्रीय अनुसन्धान ब्यूरोका अनुसार पक्राउपछि अग्रवालमाथि थप अनुसन्धान भइरहेको छ ।