वेलिङ्टन — न्युजिल्यान्ड र भारतबीच हुन लागेको स्वतन्त्र व्यापार सम्झौता हुँदैछ । यसले न्युजिल्यान्डका निर्यातकर्ताहरूका लागि करिब १.४ अर्ब जनसंख्या भएको विशाल बजारमा पहुँच पुर्‍याउने ‘पुस्तामा एक पटक आउने’ महत्त्वपूर्ण अवसर प्रदान गर्ने व्यापार तथा लगानी मन्त्री टोड म्याकलेले बताएका छन् ।

यो सम्झौता लागू भएपछि भारत निर्यात हुने न्युजिल्यान्डका ९५ प्रतिशत वस्तुहरूमा भन्सार शुल्क हट्ने वा कम हुनेछ । मन्त्री म्याकलेका अनुसार भेडाको मासु, ऊन र वनजन्य उत्पादन लगायतका ५० प्रतिशतभन्दा बढी सामग्रीहरूमा तत्कालै शून्य भन्सार शुल्क लाग्नेछ भने समयक्रममा यो सुविधा ८२ प्रतिशत वस्तुहरूमा विस्तार हुनेछ। यसले विश्वकै तीव्र गतिमा बढिरहेको अर्थतन्त्रमध्ये एक भारतमा न्युजिल्यान्डका व्यवसायीहरूलाई अन्य प्रतिस्पर्धी देशहरूसँग समान रूपमा प्रतिस्पर्धा गर्ने वातावरण सिर्जना गर्ने विश्वास लिइएको छ।

सम्झौतामा वस्तु निर्यातका साथै सीमित संख्यामा दक्ष भारतीय कामदारहरूलाई अस्थायी भिसामा न्युजिल्यान्ड प्रवेश दिने प्रावधान समेत राखिएको छ। यसका साथै किवी फल, स्याउ र मानुका मह जस्ता न्युजिल्यान्डका विशिष्ट उत्पादनहरूको पहुँच पनि भारतीय बजारमा सहज हुनेछ। व्यापारिक क्षेत्रले यसको स्वागत गरे पनि न्युजिल्यान्डको राजनीतिमा भने यसले केही विवाद निम्त्याएको छ।