काठमाडौं- चीनको सिनजियाङ क्षेत्रमा भइरहेको मानवअधिकार उल्लङ्घनको विरोधमा शान्तिपूर्ण प्रदर्शन गरेको आरोपमा कजाखस्तानले १९ जनालाई जेल सजाय सुनाएको छ। अलमाटीबाट करिब २६० किलोमिटर उत्तरमा पर्ने ताल्दीकोरगानको एउटा अदालतले उनीहरूलाई ‘जातीय वा सामाजिक कलह भड्काएको’ कसुरमा दोषी ठहर गरेको हो।

‘अताजूर्त’ नामक समूहसँग आबद्ध यी व्यक्तिहरूले गत नोभेम्बरमा सिनजियाङमा थुनिएका कजाख समुदायका नागरिक अलिमनुर तुर्गानबेको रिहाइको माग गर्दै प्रदर्शन गरेका थिए । अताजूर्त एउटा दर्ता नभएको समूह हो, जसले सिनजियाङमा कजाख र उइगुर समुदायमाथि हुने गरेको भनिएको दमनको अभिलेख राख्ने र सीमाका कारण छुट्टिएका परिवारहरूको हकमा वकालत गर्ने गर्दछ।

अदालतले १९ जनामध्ये ११ जनालाई पाँच वर्षको जेल सजाय सुनाएको छ भने बाँकीलाई ‘स्वतन्त्रतामा प्रतिबन्ध’ सहितको गैर-हिरासत सजाय दिएको छ। सजाय पाएका सबैलाई आगामी तीन वर्षसम्म कुनै पनि सार्वजनिक वा राजनीतिक गतिविधिमा संलग्न हुन प्रतिबन्ध लगाइएको छ।