काठमाडौं- पाकिस्तानको बलुचिस्तानमा पोलियो खोप अभियानमा रहेका सुरक्षाकर्मीमाथि हमला हुँदा एक सुरक्षाकर्मीको ज्यान गएको छ । बलुचिस्तानको डेरा मुराद जमालीमा पोलियो खोप टोलीमाथि अज्ञात बन्दुकधारीले गोली प्रहार गर्दा एक प्रहरी हवल्दारको मृत्यु भएको हो ।

प्रहरीका अनुसार खाजा खान घरतर्फ फर्किरहेको बेला मोटरसाइकलमा आएका आक्रमणकारीले खोप टोलीको सुरक्षामा खटिएका प्रहरीलाई निशाना बनाएका थिए। यस आक्रमणमा प्रहरी हवल्दार फरहान बशीरको घटनास्थलमै मृत्यु भएको छ।

नसीराबादका वरिष्ठ प्रहरी उपरीक्षक असद नासरका अनुसार टोलीका अन्य सदस्यहरू भने सकुशल रहेका छन्। आक्रमणकारीले ९ एमएमको पेस्तोलबाट करिब १० राउन्ड गोली चलाएका थिए।

घटनाको जिम्मेवारी हालसम्म कुनै पनि समूहले लिएको छैन। स्थानीय सुरक्षा निकायले आक्रमणकारीको खोजीका लागि त्यस क्षेत्रमा विशेष सर्च अपरेशन सुरु गरेको छ।