काठमाडौं- भारतीय प्रधानमन्त्री नरेन्द्र मोदी र अस्ट्रियाका चान्सलर क्रिष्टियन स्टकरबीच भेटवार्ता भएको छ । भेटवार्तामा दुई देशबीचको सम्बन्धलाई नयाँ उचाइमा पुर्‍याउन दुवै नेता सहमत भएका छन् ।

चार दशकभन्दा बढी समयपछि अस्ट्रियन नेताको यो पहिलो भारत भ्रमण हो । यस क्रममा क्रममा दुवै नेताहरूले युक्रेन र पश्चिम एसियाको द्वन्द्वप्रति चासो व्यक्त गर्दै द्वन्द्वले स्थायी समाधान नदिने बरु दिगो र सन्तुलित शान्तिका लागि कूटनीतिक पहल आवश्यक रहेकोमा जोड दिएका छन् ।

भ्रमणका क्रममा आतंकवाद विरोधी अभियान, रक्षा सहयोग र उन्नत प्रविधिका क्षेत्रमा महत्त्वपूर्ण सम्झौता र संयुक्त घोषणाहरू भएका छन् । प्रधानमन्त्री मोदीले सामाजिक सञ्जाल एक्समार्फत जानकारी दिँदै नवाचार, पूर्वाधार र दिगो विकासका क्षेत्रमा सहकार्य अझ प्रगाढ बनाउनेबारे छलफल भएको बताएका छन् ।

उनले व्यापार र लगानीका क्षेत्रमा नयाँ उर्जा थप्न दुवै देश प्रतिबद्ध रहेको उल्लेख गर्दै रक्षा, सेमिकन्डक्टर, भविष्यमुखी प्रविधि र स्टार्टअप जस्ता क्षेत्रहरूमा आपसी सम्बन्धको प्रचुर सम्भावना रहेको उल्लेख गरे । अन्तर्राष्ट्रिय परिस्थितिको अनिश्चितताप्रति संकेत गर्दै प्रधानमन्त्री मोदीले कुनै पनि विवादलाई शक्ति प्रयोग गर्नुको सट्टा शान्तिपूर्ण माध्यमबाट समाधान गरिनुपर्ने धारणा राखेका छन् ।

पश्चिम एसियाको घटनाक्रमबारे दुवै सरकारले संवाद, कूटनीति र निर्वाध सामुद्रिक आवतजावतलाई महत्त्व दिएका छन् भने युक्रेनका सन्दर्भमा संयुक्त राष्ट्रसंघको बडापत्र र अन्तर्राष्ट्रिय कानुनमा आधारित समाधानको समर्थन गरेका छन् ।