काठमाडौं- आगामी १८ गतेबाट प्रदर्शनमा आउन लागेको चलचित्र ‘लालीबजार’को प्रदर्शन उच्च अदालत पाटनले रोकेपछि कलाकारहरू सडकमा उत्रिएका छन् ।

अदालतले अल्पकालीन आदेश दिँदै रोक लगाएपछि कलाकारहरू सडकमा उत्रिएका हुन् । बादी समुदायको कथामा बनेको फिल्म ‘लालीबजार’को मंगलबार राखिएको प्रिमियर रद्द भएसँगै विरोधको स्वर बढेको हो ।

नायिका स्वस्तिमा खड्का शीर्ष भूमिकामा रहेको यस फिल्मले बादी समुदायको कथा उठान गरेको थियो । ‘नथिया कुप्रथा’को विषय यस फिल्ममा उजागर गर्न खोजिएको निर्माण पक्षले बताएको छ ।

यो फिल्मले उक्त समुदायको चरित्रबारे प्रश्न उठाउने भन्दै रोशनी नेपालीले रिट दर्ता गरेकी थिइन् । अदालतले छलफलका लागि दुवै पक्षले वैशाख २२ गते बोलाएको छ ।

अदालतको आदेशको पालना गर्दै निर्माण पक्षले अन्तिम समयमा आएर प्रिमियर रद्द गरेको थियो । षट्कोण आर्टस्को ब्यानरमा यो फिल्म बनेको यस फिल्मका लेखक र निर्देशक यम थापा हुन् ।

उक्त चलचित्रलाई अदालतले प्रदर्शनमा रोक लगाएपछि चलचित्रकर्मीहरू विरोधस्वरूप माइतीघर मण्डलमा उत्रिएका छन्। उनीहरूले सबैभन्दा पहिले १५ मिनेट मौन रहेर विरोध गरे । त्यसपछि प्ले कार्डसहित सडकमा आवाज उठाए। उनीहरूले अदालतबाट अभिव्यक्ति स्वतन्त्रतामाथि अंकुश लगाउने प्रयास भएको जनाएका छन् ।

यसरी विरोध गर्न पुग्नेमा स्वस्तिमा खड्का, प्रदीप भट्टराई, रवीन्द्रसिंह बानियाँ, म्याक्स दीपेश खत्रीसहित चलचित्र पत्रकारहरू पनि छन् ।