काठमाडौं– राष्ट्रिय स्वतन्त्र पार्टीका महामन्त्री तथा प्रमुख सचेतक कविन्द्र बुर्लाकोटीले सरकारले छिटो काम गर्नका लागि अध्यादेश ल्याएको बताएका छन्। 

विपक्षी दलले अध्यादेशको चौतर्फी विरोध गरेपछि डाकिएको संसदीय दलको बैठकपछि सञ्चारकर्मीसँग कुरा गर्दै बुर्लाकोटीले प्रक्रियागत लामो अभ्यास गर्नुपर्ने कारण छरितो ढङ्गबाट अध्यादेश ल्याइएको बताए। 

‘यो अध्यादेश आम नागरिकको म्यान्डेट अनुसार छिटो काम गर्नको लागि हो। हाम्रो कानुनको झमेलाको दृष्टिकोणबाट हेर्दा ३-४ महिना जति न्यूनतम पनि लाग्ने खालका छन्।’ बुर्लाकटीले भने, ‘प्रक्रियागत एउटा लामो अभ्यास गर्नुपर्ने कुराहरू छ। त्यसैले ल्याइएको हो।’

उनले विगतमा सरकारले दल फुटाउने तरिकाले अध्यादेश ल्याउने गरेको परम्परामा राष्ट्रिय स्वतन्त्र पार्टीले कानुन नीति नियम उल्लङ्घन नगरी नागरिकलाई सेवा प्रवाहमा छरितो होस् भन्ने हिसाबले अध्यादेश ल्याएको दाबी गरे । 

धेरै कुराहरूमा सरकार सञ्चालन छरितो बनाउनुपर्ने भएकाले कुरेर बस्न नसकिने बुर्लाकोटीको भनाइ छ। 

‘कैयौँ संवैधानिक आयोग, नियोगमा खाली स्थानहरू छन्, महत्त्वपूर्ण निर्णयहरू लिन व्यवहारिक कठिनाइ हुँदै छ, वा कार्यवाहकले सम्झौता गरेर चलाउन बाध्य छन्।’ उनले भने,  ‘धेरै कुरामा समय कुरेर मात्र बसिरहन सकिँदैन। जनअपेक्षा अनुसार काम गर्न केही सक्रियता र नम्र राजनीतिक आक्रामकता देखाउन आवश्यक छ।’