काठमाडौं- प्रतिनिधि सभामा स्वतन्त्र सांसद महावीर पुनले आफ्नो आत्मकथासम्बन्धी किताब बेचेरै अहिलेसम्म १८ करोड ७५ लाख रुपैयाँ आम्दानी गर्न सफल भएका छन् ।

म्याग्दीबाट प्रतिनिधि सभामा स्वतन्त्र प्रतिनिधित्व गरिरहेका उनले बुधबार सार्वजनिक गरेको सम्पत्ति विवरणमा आफ्नो आत्मकथासम्बन्धी किताब ‘महावीर पुन’ हालसम्म २ लाख ५० हजार प्रति बेचिसकेको खुलाएका हुन् ।

उनले सार्वजनिक गरेको उक्त विवरणअनुसार हालसम्म किताब बेचेर १८ करोड ७५ लाख रूपैयाँ सार्वजनिक भएको छ।

पुनको आत्मकथासम्बन्धी किताबको मूल्य ७ सय ५० रुपैयाँ राखिएको छ। जसअनुसार उनको किताबले हालसम्म १८ करोड ७५ लाख रुपैयाँ बटुल्न सफल भएको हो ।

‘मैले आफैँले लेखेको मेरा आत्मकथासम्बन्धी पुस्तक (नेपालीमा) हाल सम्म २ लाख ५० हजार प्रति बेचेर आएको सम्पूर्ण पैसा मैने राष्ट्रिय आविष्कार केन्द्र तथा वीरगञ्ज कृषि औजार कारखानाको बैंक खातामा जम्मा गरेको छु’, उनले भनेका छन्, ‘किताब बिक्री गरेर आएको रकम राष्ट्रिय आविष्कार केन्द्र तथा वीरगञ्ज कृषि औजार कारखाना सञ्चालन गर्न राष्ट्रिय आविष्कार केन्द्रको खातामा जम्मा गरिरहेको छु । आउँदो दिनमा पनि किताब बिक्रीको रकम त्यही खातामा जम्मा गर्नेछु ।’

पुनले देशभर घुमेर उक्त पुस्तक बेचेका हुन्। उनी पुस्तक बिक्री गर्दै देशभका हिमाली, पहाडी र तराईका प्राय: अधिकांश जिल्ला घुमिसकेका छन् । फागुन २१ को निर्वाचनमा विजयी भए पनि संसद् नचलेको अवस्थामा उनी किताब बेच्न सहरका चोकचोकमा पुगि जान्छन्।

सामाजिक सञ्जालमा भाइरल पुनले किताब बेच्ने क्रममा आफ्ना शुभेच्छुक र युवा-युवतीसँग हुने विवादका कारण चर्चामा आइरहन्छन् ।

अन्तरिम सरकारमा शिक्षा मन्त्री भएका उनी आफूले अघि बढाएका कानुन मन्त्रिपरिषद्मा अड्किएपछि राजीनामा दिएर चुनाव लड्न गृहजिल्ला म्याग्दी पुगेका थिए।