काठमाडौं– न्यु डायमण्ड युथ स्पोर्टस क्लब प्रधानमन्त्री कप एनभीए महिला तथा पुरुष भलिबल लिगमा महिलातर्फको फाइनलमा पुगेको छ ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा मंगलबार विभागीय टोली एपीएफ क्लबलाई ३–१ को सेटमा हराउँदै न्यु डायमण्ड फाइनल पुगेको हो ।

लगातार चौथो जित दर्ता गर्ने क्रममा पहिलो सेट २५–२१ ले आफ्नो पक्षमा पारेको डायमण्डले दोस्रो सेट २०–२५ ले गुमाए पनि त्यसपछिका दुई सेट २५–१८ र २५–२१ ले आफ्नो पक्षमा पारेको हो । जीतसँगै १२ अंक जोडेको न्यू डायमण्ड शीर्ष स्थानमा छ । 

समान चार खेल खेलेको एपीएफको ६ अंक रहेको छ । त्यस्तै महिलातर्फको अर्को खेलमा सुदूरपश्चिम प्रदेशलाई ३–० को सोझो सेटमा पराजित गर्दै त्रिभुवन आर्मी क्लबले पहिलो जित दर्ता गरेको छ । आर्मीले २५–१५, २५–१० र २५–५ ले खेल आफ्नो पक्षमा पारेको हो ।

त्यस्तै मंगलबार भएको पुरुषतर्फको खेलमा खिल्जी युवा क्लवले कोशी प्रदेश भलिबल क्लबलाई ३–० को सोझो सेटमा पराजित गर्‍यो । खेलमा खिल्जी २५–१९, २५–२० र २७–२५ ले बिजयी भएको हो ।

नेपाल भलिबल संघको आयोजनामा जारी प्रतियोगितामा क्लब च्याम्पियनसिपबाट छनोट भएका महिलातर्फका ६ र पुरुषतर्फका ८ टोलीले लिगमा प्रतिस्पर्धा गरिरहेका छन् । 

महिला र पुरुष दुवैतर्फको विजेताले १० लाख, दोस्रोले ५ लाख र तेस्रो टोलीले २ लाख ५० हजार रुपैयाँ प्राप्त गर्ने संघले जनाएको छ ।