काठमाडौं– अन्तर्राष्ट्रिय मैत्रिपूर्ण खेलमा नेपाल म्यानमारसँग ३–० गोल अन्तरले पराजित भएको छ । बिहीबार भएको खेलमा नेपाल घरेलु टोली म्यानमारसँग ३–० गोल अन्तरले पराजित भएको हो ।

पहिलो हाफमा दुई गोलले पछि परेको नेपालले दोस्रो हाफ थप एक गोल खाँदै ३–० ले पराजित भयो । कतारमा सन् २०२२ मा आयोजना हुने फिफा विश्वकप फुटबलको दोस्रो चरणको छनोट खेलिरहेको नेपालले कुवेतविरुद्वको खेल अगाडी मैत्रीपूर्ण फुटबल खेलेको हो ।

म्यानमारका म्यीन्ट तुन अउङ्गले हेडिङ मार्फत खेलको तेस्रो मिनेटमा गोल गर्दै घरेलु टोलीलाई अग्रता दिलाएका थिए । दोस्रो गोल म्यानमारले पहिलो हाफको अतिरिक्त समयमा गरेको थियो । उक्त गोल डेभिड हटनले गरेका थिए । अन्तिम गोल म्यानमारले खेलको ६९ मिनेटमा गरेको थियो ।

छनोटको सबै अवे खेल खेलिसकेको नेपालले ४ खेलमा ३ अंक जोडेको छ ।नेपाल समूहको चौंथो स्थानमा छ । यसअघि कुवेतसँग अवे खेलमा नेपाल ७–० गोल अन्तरले पराजित भएको थियो । दोस्रो खेलमा अन्जन विष्टको दुई गोल मद्दतमा नेपालले चाईनिज ताईपेलाई २–० गोल अन्तरले पराजित गरेको थियो ।

तेस्रो खेलमा अष्ट्रेलियासँग ५–० ले पराजित हुँदा अन्तिम अवे खेल जोर्डनसँग ३–० ले गुमाएको थियो ।