काठमाडौं– आइसिसी महिला टि–२० च्यालेन्ज ट्रफीमा भानुआतुले नेपाललाई ९८ रनको लक्ष्य दिएको छ ।

रुवाण्डाको किगालीस्थित गहङ्गा क्रिकेट ओभलमा मैदानमा जारी खेलमा टस जितेर पहिला ब्याटिङ रोजेको भानुआतुले  निर्धारित २० ओभरमा पाँच विकेट गुमाउँदै ९७ रनको योगफल बनाएको हो ।

भानुआतुका लागि भालेन्टा लाङ्गियातुले सर्वाधिक ४२ रनको योगदान दिइन् । उनले ५० बलमा दुई चौका र दुई छक्काको सहयोगमा ४२ रन  बनाउँदै उत्कृष्ट प्रदर्शन गरिन् । नासिमाना नवाइकाले १८ रन बनाइन् भने सेलिना सोलमन र सुसन स्टिफनले समान १०–१० रन जोडिन् ।

बलिङतर्फ नेपालका लागि रिया शर्माले उत्कृष्ट बलिङ गर्दै चार ओभरमा ११ रन खर्चेर दुई विकेट लिइन् । त्यस्तै  मनिषा उपाध्याय, कविता कुँवर र रचनाकुमारी चौधरीले समान एक–एक विकेट लिइन् । नेपाल अहिले जवाफी ब्याटिङ उत्रेको छ ।