काठमाडौं– अमेरिकी राष्ट्रपति डोनाल्ड ट्रम्पले विभिन्न देशबाट गर्भवती महिलाहरु बच्चा जन्माउनकै लागि अमेरिका आउने गरेको टिप्पणी गरेका छन् ।

सामाजिक सञ्जाल ट्रुथ सोसलमा जन्मसिद्ध नागरिकताको विपक्षमा लामो विज्ञप्ति सार्वजनिक गर्दै राष्ट्रपति ट्रम्पले बच्चालाई अमेरिकी नागरिकता दिनकै लागि नौ महिनाको गर्भवती हुँदा मान्छेहरु अमेरिका आउने गरेको बताएका हुन् ।

यसरी जन्मेको बच्चा स्वतः अमेरिकी नागरिक हुने र उनीहरुले भारत, चीन वा कुनै ‘नर्कजस्तो’ (हेलहोल) देशबाट पूरै परिवार नै ल्याउने गरेको उनको भनाइ छ । उनले यस्तो हुँदा अमेरिकामा अङ्ग्रेजी भाषा नै बोल्न छाडिएको र आप्रवासी वर्गमा अमेरिकाप्रति राष्ट्रभक्तिको भाव समेत नहुने उनको भनाइ छ ।

उनले ती आप्रवासीहरु युरोपेली मूलका अमेरिकी र उनीहरुको पुर्खाजस्तो नहुने बताएका छन् । आइरिश, पोलिश, लिथुएनियन, रोमानियन, रुसीहरु अमेरिकी समाजमा घुलमिल भएपनि नयाँ आप्रवासीहरु त्यसो हुन नसकेको उनको दाबी छ ।