बेरूत- लेबनानमा बुधबार भएको इजरायली हवाई हमलामा पत्रकार अमल खलीलको मृत्यु भएको छ।

उनी इजरायल र हिजबुल्लाहबीच जारी संघर्षको रिपोर्टिङ गरिरहेकी थिइन् । उनी रिपोर्टिङकै क्रममा एउटा घरमा आश्रय लिएर बसेकी थिइन्। हमलापछि उनको शव धेरै घण्टासम्म भग्नावशेषमुनि फसेको थियो । जसलाई उद्धारकर्मीले निकालेका हुन् ।

उनी पछिल्ला २० वर्षदेखि लेबनानको अल-अखबारका लागि रिपोर्टिङ गर्दै आएकी थिइन्। मार्चको सुरुदेखि नै उनी उक्त संघर्ष कभर गरिरहेकी थिइन्।

यसअघि पनि एउटा हवाई हमलामा उनी सवार रहेको कारनजिकै आक्रमण भएको थियो। त्यसपछि उनी अल-तिरीस्थित एक घरमा बसेकी थिइन्।

त्यसपछि त्यही घरमा दोस्रो इजरायली हमला भएको थियो, जहाँ उनी लुकेकी थिइन्। इजरायली सेनाले गाउँमा केही व्यक्तिहरूले युद्धविराम उल्लंघन गरेको र त्यसले आफ्ना सैनिकहरूलाई खतरा पुगेको दाबी गरेको छ।

इजरायली सेनाले पत्रकारहरूलाई लक्षित नगरिएको बताएको छ। यस वर्ष हालसम्म लेबनानमा मारिएका पत्रकारहरूको संख्या ९ पुगेको छ।