मध्यपूर्व- होर्मुज जलडमरूमध्य क्षेत्रमा बुधबार कम्तीमा तीन वटा जहाजमा गोली प्रहार भएको छ। यो जानकारी रोयटर्स र युनाइटेड किङ्गडम म्यारिटाइम ट्रेड अपरेशन्स (युकेएमओटी) ले दिएका हुन्।

समाचारअनुसार, ओमानको उत्तरपूर्वतर्फ लाइबेरियाको झण्डा बोकेको एक कन्टेनर जहाजमाथि गोली र रकेट आक्रमण भएको छ । जसले जहाजको ब्रिज भागमा क्षति पुर्‍याएको छ। तर जहाजका सबै चालक दल सुरक्षित रहेका छन्।

त्यसैगरी, पनामाको झण्डा बोकेको अर्को जहाजमाथि पनि आक्रमण भएको छ, जुन इरानबाट करिब ८ नटिकल माइल दूरीमा थियो। उक्त जहाज र चालक दल दुवै सुरक्षित रहेका छन्।

तेस्रो कन्टेनर जहाजमाथि पनि इरानबाट करिब ८ नटिकल माइल पश्चिमतर्फ गोली प्रहार गरिएको बताइएको छ।

यो जहाज होर्मुज जलडमरूमध्यबाट बाहिर निस्किँदै थियो, जसले लाइबेरियाको झण्डा फहराएको थियो। यसमा पनि कुनै मानवीय क्षति नभएको बताइएको छ।