हैदराबाद– युवा प्रारम्भिक ब्याटर अभिषेक शर्माको विष्फोटक अविजित शतकको मद्दतले इन्डियन प्रिमियर लिग (आईपीएल) को ३१ औँ खेलमा सनराइजर्स हैदराबादले दिल्ली क्यापिटल्समाथि ४७ रनको फराकिलो जित दर्ता गरेको छ। मंगलबार राति हैदराबादस्थित घरेलु मैदानमा भएको खेलमा टस हारेर पहिले ब्याटिङ गरेको घरेलु टोलीले निर्धारित २० ओभरमा मात्र २ विकेट गुमाएर २४२ रनको विशाल योगफल तयार पारेको थियो।

हैदराबादका लागि ‘प्लेयर अफ द म्याच’ समेत चुनिएका अभिषेक शर्माले सानदार ब्याटिङ गरे। उनले ६८ बलको सामना गर्दै १३५ रनको अविजित इनिङ खेले। उनको यो विष्फोटक प्रदर्शनमा दिल्लीका कुनै पनि बलर टिक्न सकेनन्। विशाल लक्ष्य पछ्याउने क्रममा दिल्ली क्यापिटल्सले २० ओभरमा ९ विकेट गुमाउँदै १९५ रन बनाउन सक्यो।

खेलको सुरुदेखि नै आक्रामक देखिएका अभिषेकले मैदानको चारैतिर प्रहार गर्दै दिल्लीको बलिङ लाइनअपलाई ध्वस्त पारेका थिए। ब्याटिङमा मात्र नभई फिल्डिङमा पनि उनले दुई महत्त्वपूर्ण क्याच लिँदै टोलीको जितमा बहुआयामिक भूमिका निर्वाह गरे।

२४३ रनको कठिन लक्ष्य पछ्याएको दिल्लीले सुरुदेखि नै दबाब झेल्नुपरेको थियो। नियमित अन्तरालमा विकेट गुमाएको दिल्लीका लागि कुनै पनि ब्याटरले ठुलो साझेदारी गर्न सकेनन्। दिल्लीका नितिश रानाले ५७ रन जोड्दै अर्धशतक बनाउनु बाहेक अन्य ब्यट्सम्यान टिक्न सकेनन् ।

यो जितसँगै सनराइजर्स हैदराबाद अङ्क तालिकाको तेस्रो स्थानमा उक्लिएको छ भने पराजित दिल्ली पाँचौँ स्थानमा छ। हैदरबादले सात खेलमा चार जित निकाल्दै आठ अंक जोडेको छ भने ६ खेल खेलेको दिल्लीले तीन जितसहित ६ अंक जोडेको छ ।