काठमाडौं- अमेरिकी राष्ट्रपति डोनाल्ड ट्रम्पले इरानसँगको युद्धविराम नलम्बिने प्रष्ट पारेका छन् । सीएनबीसीसँगको अन्तर्वार्तामा उनले दुई साता लामो युद्धविरामको समय थप नहुने बताएका हुन् । इरान र अमेरिकाबीच कायम युद्धविरामको मिति बुधबार सकिँदैछ ।

इरानसँग शान्ति वार्ताका लागि धेरै समय नभएको उनको भनाइ छ । अमेरिका अहिले बलियो स्थितिमा रहेकोले इरानसँग राम्रो सम्झौता हुने ट्रम्पले दाबी गरे ।

छिट्टै सम्झौता नभएमा अमेरिकाले पुनः आक्रमण सुरु गर्ने चेतावनी दिएको छ । ट्रम्पका अनुसार अमेरिकी सेना आक्रमणका लागि पूर्ण रूपमा तयार छ।

पाकिस्तानको राजधानी इस्लामावादमा हुने भनिएको शान्ति वार्ता अझै अनिश्चित छ । समाचार संस्था रोयटर्सका अनुसार एक जना वरिष्ठ इरानी अधिकारीले वार्तामा सहभागी हुनेबारे विचार भइरहेको बताए पनि अहिलेसम्म आधिकारिक पुष्टि भएको छैन ।