काठमाडौं- प्रधानमन्त्री र गृहमन्त्रीलाई गोली हान्ने धम्की दिएको आरोपमा एक जना पक्राउ परेका छन् । प्रहरीले प्रधानमन्त्री वालेन्द्र शाह र गृहमन्त्री सुधन गुरुङलाई गोली हान्ने धम्की दिएको आरोपमा बझाङ जिल्ला थलरा गाउँपालिका वडा नं ४ मयल बस्ने सानु भाई भन्ने साजन विष्टलाई पक्राउ गरेको हो ।

उनलाई गत ५ गते काठमाडौंको सिनामंगलबाट पक्राउ गरी विद्युतीय कारोवार ऐन २०६३ को दफा ४७ बमोजिम कसुरमा थप अनुसन्धान तथा आवश्यक कारवाहीको लागि साइबर व्यूरो भोटाहिटी पठाइएको काठमाडौं उपत्यका अपराध अनुसन्धान कार्यालयले जनाएको छ ।

उनले सामाजिक सञ्जालमार्फत् पूर्वप्रधानमन्त्री केपी शर्मा ओली, पूर्वगृहमन्त्री रमेश लेखक, पूर्वमन्त्री दिपक खड्कालाई तुरुन्त रिहा नगरे प्रधानमन्त्री र गृहमन्त्रीलाई गोली हान्न बाध्य हुने धम्की दिएका थिए ।

यसका लागी एके४७ जस्ता अत्याधुनिक ठूला हतियारहरु काठमाडौँ भित्रिसकेको छ भनी सामाजिक संजालमार्फत् जनमानसमा त्रास फैलाउने र आफूले भनेका कुराहरु नमानेमा हालको प्रधानमन्त्री तथा गृहमन्त्रीलाई ज्यान मार्ने धम्कीपूर्ण भिडियो जारी गरेको काठमाडौं उपत्यका अपराध अनुसन्धान कार्यालयले जनाएको छ ।