काठमाडौं- राष्ट्रिय स्वतन्त्र पार्टीबाट दोस्रो महामन्त्री भूपदेव शाह बन्ने सम्भावना बढेको छ । वरिष्ठ नेता वालेन्द्र शाह (बालेन) पक्षबाट यसअघि २०८२ पुस १३ को सहमतिअनुसार महामन्त्री बनेका सुनिल लम्साल भौतिक पूर्वाधार तथा सहरी विकास मन्त्री भएका छन् ।

यस्तोमा अब बालेनले काठमाडौं महानगरमा हुँदा कुमार बेनजस्तै आफ्ना अर्का सहयोगी भूपदेवलाई महामन्त्रीमा अगाडि सार्न लागेका हुन् ।

भूपदेव काठमाडौंको मेयर हुँदा बालेनको सचिवालयमा काम गरेका विश्वास पात्र हुन् । तर उनले फागुन २१ को निर्वाचनमा अछाम क्षेत्र नम्बर २ बाट जित निकाल्न सकेनन् । चुनाव हारेपछि आफ्नो सचिवालयमा नलगेका प्रधानमन्त्री बालेनले भूपदेवलाई अब पार्टीको शक्तिशाली नेता बनउन लागेका हुन् ।

यस अगाडि बालेनसँगै गत पुसन १३ गतेको ७ बुँदे सहमतिका आधामार राष्ट्रिय स्वतन्त्र पार्टीमा प्रवेश गरेका सुनिललाई महामन्त्री बनाएको थियो । तर लम्साल मन्त्री भएपछि बालेनले आफूनिकटहरूको जिम्मेवारी हेरफेर गर्न लागेका हुन् ।

सोमबार वनस्थलीमा बसिरहेको केन्द्रीय समिति बैठकबाट भूपदेवलाई महामन्त्री बनाउने प्रस्ताव पारित गर्ने स्रोतले जानकारी दिएको छ। राष्ट्रिय स्वतन्त्र पार्टीका शीर्ष नेताहरू वालेन्द्र र सभापति रवि लामिछानेबीच भूपदेवलाई महामन्त्री बनाउने विषयमा करिब सहमति रहेको बताउँछन् ।

‘आज नै केन्द्रीय समिति बैठकबाट प्रस्ताव पारित गरेर भूपदेवलाई महामन्त्री बनाउने प्रबल सम्भावना छ। बैठक यसबारे छलफल हुँदैछ’, एक नेताले भने, ‘सुनिल मन्त्री भएपछि भूपदेवलाई शक्तिशाली भूमिकामा अगाडि सार्न खोजिएको हो ।’