काठमाडौं- इरानको संयुक्त सैन्य मुख्यालयले अमेरिकी ‘सशस्त्र समुद्री डकैती’ को जवाफ दिने चेतावनी दिएको छ । इरानी सैन्य मुख्यालय खातम अल अन्बियाले पछिल्लो समय अमेरिकाले इरानी जहाजमाथि गरेको हमलाको जवाफ दिने चेतवनी दिएको हो । इरानले यस घटनालाई डकैतीको संज्ञा दिएको छ ।

यसअघि अमेरिकी राष्ट्रपति डोनाल्ड ट्रम्पले ओमानको खाडीमा सञ्चालित इरानी जहाजमाथि अमेरिकी नौसेनाले कारवाही नियन्त्रणमा लिएको जनाएका थिए । अमेरिकी नौसेनाको यस कदमपछि इरान चिढिएको छ ।

पाकिस्तानको राजधानी इस्लामावादमा अमेरिका र इरानबीच हुने भनिएको दोस्रो चरणको शान्ति वार्ताअघि विकसित पछिल्लो घटनाक्रमले अनिश्चितता बढाएको छ ।

अमेरिका र इरानबीच २२ अप्रिलमा युद्धविराम सकिँदै छ। यसअघि इरानले पाकिस्तानमा हुने दोस्रो चरणको वार्तामा सहभागी हुन अस्वीकार गरेको थियो ।

इरानले अमेरिकामाथि अत्यधिक माग, अव्यवहारिक सर्त, बारम्बार अडान परिवर्तन र विरोधाभासी अभिव्यक्तिले वार्तामा अवरोध सिर्जना गरेको आरोप लगाएको छ। यसका साथै, अमेरिकाले झूटो प्रचार गरेको पनि इरानको भनाइ छ।

इरानले अमेरिकी नौसैनिक नाकाबन्दीलाई युद्धविराम सम्झौताको उल्लङ्घन भएको बताउँदै अमेरिकाको धम्कीपूर्ण भाषाले अवस्था झन् बिग्रिएको जनाएको छ। यी परिस्थितिमा वार्ता हुने सम्भावना निकै कम रहेको उल्लेख गरिएको छ।