काठमाडौं- नेपाली कांग्रेसको सुदूरपश्चिम प्रदेश कार्यसमिति सभापति वीरबहादुर बलायरले निवर्तमान उपसभापति पूर्णबहादुर खड्कालाई अनुशासनको कारबाही गरेर देखाउन सभापति गगनकुमार थापालाई चुनौती दिएका छन् ।

आइतबार देउवा समूहले धुम्बाराहीमा राखेको छलफलमा सहभागी भएका उनले हिम्मत भए लेटरप्याड दुरुपयोगको आरोपमा खड्कालाई २४ घण्टाभित्र कारबाही गरेर देखाउन थापालाई चुनौती दिएका हुन् ।

‘हिम्मत भए लेटरप्याड दुरुपयोग काण्डमा पूर्णबहादुर खड्कालाई २४ घण्टाभित्र कारबाही गरेर देखाऊ, ‘बलायरले चेतावनीको शैलीमा, ‘तर उक्त कारबाहीपछि आउने परिणाम पनि भोग्न तयार रहनू ।’

बलायरले पार्टीभित्रको सङ्घर्ष र त्याग सानेपाको पदमा रहेकाहरूको भन्दा धुम्बाराही बैठकमा बसेका नेताहरूको ठूलो रहेको बताए ।

कांग्रेस उपसभापति विश्वप्रकाश शर्मा प्रतिनिधिसभा निर्वाचनमा प्रचार प्रसारका लागि पुगेको सबै ठाउँमा जमानत जफत भएको आरोप पनि उनले लगाएका छन् ।