काठमाडौं- अमेरिकी नाकाबन्दीका बावजुद पनि इरानका तीनवटा तेल ट्यांकर होर्मुज स्ट्रेट पार गर्दै खाडीबाट बाहिर निस्केका छन् ।

मेरिटाइम ट्र्याकिङ फर्म केपलरका अनुसार, डीप सी, सोनिया-१ र डायोना नामका यी तीन ट्यांकरले करिब ५० लाख ब्यारल कच्चा तेल बोकेर निकालेका हुन् ।

यी जहाजहरूले यो महिनाको सुरुवातमा इरानको खार्ग आइल्यान्डबाट तेल भरेका थिए । यिनले बुधबार होर्मुज स्ट्रेट पार गरेका थिए ।

अमेरिकाले सोमबार मात्र इरानी बन्दरगाहहरूमा नाकाबन्दी लागू गरेको थियो, जसको मुख्य उद्देश्य इरानको तेल निर्यात रोक्नु थियो । तर, यसको बाबजुद यी तीन ट्यांकर खाडीबाट बाहिर निस्कन सफल भएका छन् ।

केपलरका अनुसार, यसअघि १० अप्रिलमा स्टारला नामको ट्यांकर होर्मुज पार गरेको थियो । त्यसपछि यो नै पहिलो ठूलो तेल ट्यांकरको आवतजावत हो ।

अमेरिकाले तेल निर्यात रोक्न कडा नाकाबन्दी लागू गरे पनि इरानले आफ्नो तेल निर्यातलाई केही हदसम्म निरन्तरता दिन खोजिरहेको देखिन्छ ।