काठमाडौं- चीनले इरानलाई मिसाइलमा प्रयोग हुने इन्धन बनाउन आवश्यक रसायन पठाएको आशंका गरिएको छ। पछिल्लो समय जारी युद्धका बीच प्रतिबन्धमा परेका इरानका चारवटा जहाज चिनियाँ रसायन बोकेर इरानी बन्दरगाहमा पुगेको दाबी गरिएको छ। समुद्री यातायातको तथ्याङ्क विश्लेषण अनुसार यी जहाजहरूले मिसाइलको ठोस इन्धन बनाउन प्रयोग हुने सोडियम परक्लोरेट’ ढुवानी गरेको हुन सक्ने देखिएको छ।

यी जहाजहरू चीनको झुहाईस्थित गाओलान बन्दरगाहबाट प्रस्थान गरेका थिए। यो क्षेत्र तरल रसायन भण्डारणका लागि चीनकै सबैभन्दा ठुलो केन्द्र मानिन्छ। विज्ञहरूका अनुसार यी जहाजमा रहेका रसायनबाट सयौँ ब्यालिस्टिक मिसाइलहरू तयार पार्न सकिन्छ। अर्को एउटा जहाज पनि इरानी समुद्री क्षेत्र नजिकै तैरिरहेको अवस्थामा फेला परेको छ।

अमेरिका र इजरायलले पाँच हप्तादेखि गरेको तीव्र बमबारीपछि इरानसँग नयाँ हतियार बनाउने क्षमता कति बाँकी छ भन्ने स्पष्ट छैन। तर, अमेरिकी पूर्व अधिकारीहरूका अनुसार यी गतिविधिले इरान आफ्नो मिसाइल इन्धनको अभाव पूर्ति गर्न कडा प्रयास गरिरहेको संकेत गर्दछ। यस घटनाले इरानको सैन्य गतिविधिलाई चीनले गोप्य रूपमा सहयोग गरिरहेको त छैन भन्ने प्रश्न समेत उठाएको छ।