काठमाडौं- भारतीय प्रधानमन्त्री नरेन्द्र मोदीले गुजरात राज्यस्थित अहमदाबादको सानन्दमा ३ हजार ३ सय करोड भारुको लागतमा निर्मित सेमिकन्डक्टर प्लान्टको उद्घाटन गरेका छन् । ‘केन्स टेक्नोलोजी’ द्वारा निर्मित यो प्लान्ट भारतको दोस्रो ठूलो चिप उत्पादन केन्द्र हो ।

यसले भारतको आन्तरिक चिप उत्पादन क्षमतालाई बलियो बनाउने विश्वास गरिएको छ। प्रधानमन्त्री मोदीले भारत विश्वव्यापी सेमिकन्डक्टर आपूर्ति प्रणालीमा एक भरपर्दो साझेदार बन्ने लक्ष्य राखेको बताए । भारतले पछिल्लो बजेटमा ‘सेमिकन्डक्टर मिसन २’ को सुरुवात गरेको छ।

यसको मुख्य उद्देश्य हरेक उत्पादन क्षेत्रमा भारतलाई आत्मनिर्भर बनाउनु हो । प्रधानमन्त्री मोदीका अनुसार भारत अब विश्वमा आउने परिवर्तनको साक्षी मात्र नभई त्यसको नेतृत्व गर्न तयार छ । भारतले ‘प्याक्स सिलिका’ पहलमा सहभागी हुने निर्णय गरेसँगै चिप बनाउन आवश्यक पर्ने महत्त्वपूर्ण खनिजहरूमा पहुँच बढ्ने उनले उल्लेख गरे ।

गुजरातका विज्ञान तथा प्रविधि मन्त्री अर्जुन मोढवाडियाका अनुसार यस प्लान्टबाट दैनिक ७ लाखभन्दा बढी चिपहरू उत्पादन हुनेछ । केही समयअघि मात्रै माइक्रोन सेमिकन्डक्टर प्लान्टको पनि उद्घाटन गरिएको थियो । प्रधानमन्त्रीले विकसित देशहरूमा वर्षौँ लाग्ने यस्ता जटिल प्रक्रियाहरू भारतले ९०० दिनमै पुरा गरेको दाबी गरे ।

स्पष्ट नीति र राष्ट्रिय विकासप्रतिको समर्पणले असम्भव कार्य पनि सम्भव भएको उहाँको भनाइ छ। यसैबीच, प्रधानमन्त्री मोदीले गान्धीनगरको कोबा तीर्थमा सम्राट सम्प्रति संग्रहालयको पनि उद्घाटन गरे । महावीर जयन्तीको अवसर पारेर उद्घाटन गरिएको यस संग्रहालयले जैन धर्मको ऐतिहासिक र सांस्कृतिक विरासतलाई समेटेको छ।