काठमाडौं – ‘कमेडी दरबार’का जजका लागि निर्माण गरेको चरित्रका कारण विवादमा फसेपछि हाँस्य कलाकार मनोज गजुरेलले माफी माग्नु परेको छ । 

उनले बिहीबार सामाजिक सञ्जालमार्फत प्रेस विज्ञप्ति जारी गरी माफी मागेका हुन् । 

मनोज कमेडी दरबारको तेस्रो सिजन घोषणा कार्यक्रममा सहभागी हुँदा महाराजको चरित्रमा देखिएका थिए । त्यही कार्यक्रमको भिडियो र फोटो सार्वजनिक भएपछि उनको आलोचना सुरु भएको हो । 

राजावादीहरूले उनको आलोचना गरेका हुन् । पूर्वराजा ज्ञानेन्द्र शाहसँग हुलिया मिलेपछि उनीहरू चिडिएका छन् । 

हुलिया मिलेकै कारण भएको आलोचनमा मनोज माफी माग्न बाध्य भए । 

उनले कमजोरी भएको स्वीकार गर्दै लेखेका छन्, ‘कमेडी दरबार टिमले एउटा काल्पनिक चरित्रका रूपमा मात्र प्रस्तुत गरिएको थियो । तर, सार्वजनिक संवेदनशीलताका विषयमा हाम्रो तर्फबाट कमी–कमजोरी हुन गएमा खुला हृदयले क्षमा माग्दछौं ।’

यति मात्रै होइन उनले आगामी दिनमा थप सचेत र जिम्मेवार रहनेसमेत प्रतिबद्धता जनाएका छन् ।