काठमाडौँ – नेता सुदन किराँतीले नेताले केके गर्नुपर्छ थाहा पाएर मात्रै नहुने र के गर्न हुँदैन भन्ने पनि थाहा पाउन जरुरी रहेको बताएका छन् ।

सरकारले सार्वजनिक गरेको राष्ट्रिय प्रतिवद्धता पत्रमा पूर्व–पश्चिम राजमार्गको नाम परिवर्तन गर्नेबारे उल्लेख रहेको भन्दै उनले ध्यानाकर्षण गराएका हुन् ।

‘देश बनाउछु भन्ने नेताले के–के गर्नुपर्छ भन्ने थाहा पाउनु मात्र प्रयाप्त हुदैन, के–के गर्नु हुँदैन भन्ने पनि थाहा पाउन त्यतिकै जरूरी हुन्छ,’ उनले भनेका छन् , ‘बालेन सरकारले सार्वजनिक गरेको “राष्ट्रिय प्रतिवद्धता पत्र“मा पूर्व–पश्चिम राजमार्गलाई “महेन्द्र राजमार्ग” नामाकरण गरेर दिनु खोजेको सन्देश के हो ? गणतान्त्रिक सरकारलाई राजतन्त्रसँग जोडिएका प्रतीकहरूप्रति अति मोह जागृत भएको हो ?’

उनले बालेनपछि रास्वपा सभापति रवि लामिछानेलाई पनि प्रश्न गरेका छन् । लामिछानेले नयाँ वर्षको रुपमा शुभकामना दिँदा यो वर्ष खिल निकाल्ने वर्ष भएको र पीडा हुन सक्छ भनेकोप्रति किराँतीले टिप्पणी गरेका छन् ।

‘राष्ट्रिय स्वतन्त्र पार्टीको सभापति रवि लामिछानेले नयाँ वर्षको शुभकामना सँगै “यो खिल निकाल्ने वर्ष हो, पीडा हुन सक्छ“ भन्नु भएको थियो । के गणतन्त्रलाई रास्वपाले खिलको रूपमा लिन थालेको हो ?’ उनले सोधेका छन् ।