काठमाडौं- भारतीय जनता पार्टी भाजपाका नेता सम्राट चौधरी बिहारको मुख्यमन्त्री बन्ने भएका छन् । बिहारमा एनडीए गठबन्धनले सम्राट चौधरीलाई आफ्नो नेता चयन गरेसँगै उनी मुख्यमन्त्री बन्ने निश्चित भएको हो । यसअघि भाजपाका वरिष्ठ नेता शिवराज सिंह चौहानले सम्राट चौधरी विधायक दलको नेता चुनिएको घोषणा गरेका थिए । उनले बुधबार बिहानै मुख्यमन्त्रीको शपथ लिने कार्यक्रम छ ।

मंगलबार नितिश कुमारले मुख्यमन्त्री पदबाट राजीनामा दिएपछि पटनामा भाजपाको बैठक बसेको थियो । मुख्यमन्त्री बन्ने भएपछि चौधरीले पार्टीको विचारधारा र देशलाई अगाडि बढाउने काम जारी राख्ने बताए । उनले नितिश कुमारबाट आफूले सरकार चलाउन सिकेको पनि उल्लेख गरे ।

सम्राट चौधरीले प्रधानमन्त्री नरेन्द्र मोदीको विकसित भारत र नितिश कुमारको समृद्ध बिहारको सपना मिलेर पूरा गर्ने प्रतिबद्धता जनाए । पछिल्लो तीन दशकदेखि लालू यादव र नितिश कुमारकै वरिपरि घुमिरहेको बिहारको राजनीतिले नयाँ मुख्यमन्त्री पाउन लागेको हो ।

राष्ट्रिय लोक मोर्चाका नेता उपेन्द्र कुशवाहाले सम्राट चौधरीलाई सामाजिक सञ्जालमार्फत बधाई दिएका छन् । केन्द्रीय मन्त्री गिरिराज सिंहले पनि चौधरीलाई बधाई दिँदै नीतीश कुमारको निर्णयका कारण यो परिस्थिति बनेको बताए ।