काठमाडौं- सरकारले सार्वजनिक गरेको राष्ट्रिय प्रतिबद्धतापत्रको मस्यौदामार्फत् शिक्षा प्रणालीमा महत्वपूर्ण सुधारको योजना ल्याएको छ। नयाँ नीतिअनुसार विद्यालयदेखि उच्च तहसम्मको पाठ्यक्रममा योग, ध्यान, नैतिक शिक्षा तथा आयुर्वेद समावेश गरिने भएको छ।

दस्तावेजमा अनुसार शिक्षालाई केवल सैद्धान्तिक ज्ञानमा सीमित नराखी जीवनोपयोगी, व्यवहारिक र स्वास्थ्य-केन्द्रित बनाउने उद्देश्य राखिएको छ।

विद्यार्थीको शारीरिक, मानसिक र नैतिक विकासलाई सन्तुलित रूपमा अघि बढाउन योग र ध्यानलाई अनिवार्य अभ्यासका रूपमा जोड्ने तयारी गरिएको छ।

यस्तै, नैतिक शिक्षामार्फत विद्यार्थीमा अनुशासन, जिम्मेवारीबोध र सामाजिक मूल्य–मान्यताको विकास गर्ने लक्ष्य राखिएको छ।

आधुनिक शिक्षासँगै परम्परागत ज्ञान प्रणालीलाई समेट्दै आयुर्वेदलाई पनि पाठ्यक्रममा समावेश गरिने बताइएको छ, जसले प्राकृतिक उपचार र स्वस्थ जीवनशैलीप्रति जागरूकता बढाउने अपेक्षा गरिएको छ।

सरकारले यसलाई शिक्षा क्षेत्रको दीर्घकालीन सुधारका रूपमा लिँदै व्यवहारिक सीप, स्वास्थ्य सचेतना र संस्कृतिसँग जोडिएको शिक्षालाई प्राथमिकता दिएको जनाएको छ।